Feeds:
Posts
Comments

Posts Tagged ‘philosophical’

Desh k vibhinna vargon se jo vichitra prajatiyon k log yahan aaj is webdainiki pe pralekh ko padhne k liye aatur hue hain mera un sabhi ko shat shat naman. Sabse pehle to mai aap sabhi ka shukraguzar hoon ki aap sabhi ne is naatkiya anuched ko padhne me ruchi dikhayi. Par mai aapko bata du ki bhale hi aapne yahan aake apni ruche dikhayi ho, par mai yahan koi “ruchi” nahi dikhane wala hu. Yeh webdainiki sabhi vargon ki matayein aevam behnein bhi padhti hain isliye mai ispe kuch bhi appattijanak tippani nahi kar sakta. Kyunki mere saare lekh mahila pradhan hote hain to aap yahan bhi kuch aisi hi umeed kar rahe honge. Par yahan na to mai koi hasyatmak vyang prastut karne jar raha hu na hi kisi naari ka ullekh karne. Yeh lekh mene apne jeevan ke kuch mahatvapurna pahluon me seekhi kuch ghanisth baton k upar likha h.

Mai khud ko jyada gyani mahapurush to nahi manta par haan mujhe lagta hai ki mai khudse itna keh sakta hu ki haan mene itni duniya aur itne tarah k log dekhe hain ki ab mai unme  parakh kar sakta hu kon humara kitna hiteshi h aur kaun kitna nai. Par mai aapko aaj is par koi pravachan nahi dene ja raha hu.

Kai bar humare jeevan me koi aisa aata hai jo ki jab tak humare paas rehta hai, hume yeh ehsas karata hai ki hum unke liye kuch khas hain.Phir bhale hi hum uske k liye aisa na soch paye hon. Woh hume jarurat se jyada mahatv deta h, pal pal humare sath khada hota h chahe kitni bhi visham paristhitiyan kyu na aa jaye. Wo koi humare itne paas hote hue bhi kai bar hum use andekha kar dete hain yaa ye kahiye ki hum us oor dhyan hi nahi dete. Mai iske liye ek udahran pesh karna chahunga. Yeh udahran aapko samjhayega ki kitna mahatvapurna hota hai is baat ko sochna jo mai aapko samjane ki chestha kar raha hu.

Aap man lijiye ki aap ek bahut bade raajneta hain. Aapki paas aseem jansankhya k log hain jo ki aapko naman karte hain aur apke sath khade rehkar aapko pal pal is bat ka ehsas karate hain ki aap unke liye kuch khas hain. Yeh jo log hain jo aapko aapke hone ka ehsas dilate hain, aapse kuch nahi mangte. Bas ye log aapse yeh chahte hain ki jitna pyar,sneh aur apnapan aapne inse mat mangne k samay dikhaya uska adha hi sahi, par aap ye bandhan na tode.

Khud ki tulna rajneta se hote dekh aap log chakit jaroor hue honge aur is vichar me honge ki yeh humari tulna raajnetaon se kyu kar raha hai. To ab mai samjhata hu.

-Ek neta jisne abhi abhi chunav ladne ka man banaya hai aur uske pas koi samarthak nahi hain. Yeh thik aapki jeevan ki shuruat ki tarah h jisme aapki shuruat akele hi hoti h.

-Phir aap logon ko dhundhte hain, parakhte hain aur samjhte hain ki kaun kis tarah ka hai aur kon aisa h jo humara hamesha saath de. Yahi kaam ek neta karta h aur weh apne samarthakon ka ek varg dhundhne me lag jata hi ki kuch bhi ho ye chunav me humara saath jaroor dega.

-Jitne ache logon se aap chir-parichit honge aur jitney kaam ke varg k logon se ek neta pehchan banayega, utna hi dono apne chetra me safal honge.

-Parantu galti humse aur ek neta se yahi ho jati hai ki jab hum ye samjh lete hain ki jinhone ab tak humara sath diya aur ab tak hume palko pe betha k rakha wo to humare hi hain kahan jayenge.

-Aur yahin shuruat hoti hai patan ki. Agar ek neta apne kisi aise varg k logon pe se dhyan hata le jo uske liye sabse mahatvapurna ho, to uske saath kya hota hai yeh mujhe aapko batane ki jaroorat  nahi h. Ve log uska neta ka sath chod dete hain jiske ab unki kadra hi nahi rahi ho. Aur phir who neta jab doob jata h, sab haar jata hai, tab use is baat ka ehsas hota h ki ye log mere liye kitni ahmiyat rakhte the aur mai inka sahi mahatva na samajh saka.

-Par tab tak bahut der ho chuki hoti hai. Kyunki un logon ka us neta par se vishwas uth jata hai. Aur yeh to sabhi jante honge ki jinpe aap agar bharosa karte hon aur agar wahi aapka vishwas tod dein, to jo ghav milte hain unka bhar pana bahut mushkil hota h. Yeh mai koi asadharan si baat nahi bol raha hu. Is bat ko aap sabhi ne khud kabhi na kabhi kisi na kisi mod pe mehsus kiya hoga.

-Aur yahi hashra humara bhi hota h jab hum kisi apne ko who ahamiyat nahi dete jiska who haqdar hai, to weh humara sath kab chod de aur kab hume akela tanha chod de yeh hum khud nahi jaan pate. Par jab hume apne jeevan me kuch kami si mehsus hoti h aur aisa lagta hai ki kuch hai jo mene kho diya h tab jake hum yeh mehsoos kar pate hain ki humne kya khoya hai. Par jaisa ki mene pehle kaha tha ki tab tak bahut der ho chuki hoti hai.

Upar likhe sabhi binduon ki madad se mene aapko yeh to darsha diya ki haan aapka jeevan ek raajneta ki tarah h.

Par ek jagah hai jahan hum netaon se pare ho jate hain. Neta logon ka kuch se sath tootata hai to unhe naya bananne me der nahi lagti. Par humari asal jindagi me humare liye yeh utna hi mushkil hota h jitna ki sookhi nadi me naav chalana.

Mene yeh baaten apne jeevan k un katu palon me seekhi hain jab mene kisi bahut hi apne insaan ko apne se bahut door kar diya tha jiske liye har waqt mai sabkuch tha.

Mai to waqt rehte sambhal gaya par kahin aisa na ho ki aap apne kisi khas k paas hote hue bhi door hote jayen.

Apni choti si jindagi me jhank kar dekho aur pehchano un logon ko jinki wajah se apko apni jindagi khusnuma aur aasan si lagne lagi h.

Dhanyawad….Apka bahut bahut aabhaar.

Aur haan agar mai kisi k liye khas hu kripiya neeche jo sitara bana use daba mujhe aur khas banaye. Mujhe use bhi jayad khas banane k liye aap is webdainiki pe neeche diye sthan me tippani bhi kar sakte ho. Par mai chahunga ki aap apni visudh, akoot tippani hi karen.

Read Full Post »